Тука, во Волино, Дебрца, по селските калливи улици ги направив првите чекори, растев со детските игри, го започнав моето образование, се изградив, оформив семејство, се вработив, тука живеам и заедно ја споделувам  радоста и тагата со моите сограѓани. Кога вака ќе се навратам наназад, гледам дека сите важни работи во мојот живот ми се случија тука, во срцето на моето село, во општина Дебрца. Токму затоа, селото  претставува центарот на мојот свет,  моето животно сидро и како дете од село  тука имам намера да останам, а општина Дебрца е нашиот заеднички дом, во кој секој од нас треба да ја гледа својата иднина и својата шанса. Одлично ја познавам душата на селото, добро ги познавам секојдневните проблеми и маки на месното население,  бидејќи тоа се и мои секојдневни проблеми за кои активно сум учествувал во нивното решавање. Како ќе ја водам општина Дебрца? Транспарентно, одговорно, домаќински, тимски. Затоа што, како што моите дедо и баба живееа и создаваа тука, како што моите родители живееа и создаваа тука, така сакам и моите синови, да живеат и создаваат тука, така сакам и моите внуци да живеат и создаваат тука, во Дебрца. Подигањето на квалитетот на живеење во општина Дебрца е мојата главна цел. И граѓаните кои живеат на село имаат право на чиста вода, здрава животна средина, квалитетно образование и здравствена заштита, безбеден и спокоен живот. Изготвивме прецизен план како да го постигнеме тоа во сите области каде има надлежност општината, но, и во оние каде општинската власт, според законската регулатива, нема одговорност. Сметаме дека наша обврска е да се ангажираме и да помогнеме секаде онаму каде што можеме. Искрено верувам дека имаме сила и знаење заеднички да го оствариме тоа. Не чека многу работа, но ќе ги засукаме ракавите и верувајте ќе успееме. Ќе се избориме за подобра и надежна Дебрца, за подобра и надежна Македонија, во кои  искрено верувам.

Искрено Ваш,

Градоначалник, Општина Дебрца