Apr 28, 2026
25 години од Вејце – 25 години сеќавање, почит и обврска да не заборавиме.
Денеска во с. Слатино, со длабока почит им се поклонивме на загинатите бранители од 2001 година, меѓу кои и Игор Костески од с. Слатино – млад човек кој својот живот го положи за Македонија.
Со особено чувство на гордост и одговорност, ја откривме бистата во негова чест. Овој спомен не е само белег на минатото, туку жив повик да ја чуваме вистината, достоинството и слободата што ни се оставени како аманет.
Ја посетивме и спомен-собата на Игор Костески, место кое тивко, но силно сведочи за неговиот живот, неговата храброст и големината на неговата жртва.
Достоинството на денешниот настан беше збогатено со настапот на оркестарот при ОУ „Дебрца“, кој со својата изведба внесе дополнителна емоција и почит кон овој значаен ден.
Присуството на припадниците на Армијата, ветераните и жителите на Слатино беше силна потврда дека споменот за нашите херои не бледнее – туку живее во нашата заедничка свест и одговорност.
Нека Слатино биде чувар на ова сеќавање, а бистата на Игор – вечен сведок на храброста и љубовта кон татковината.
Вечна му слава на Игор Костески!
Нека му е лесна земја!
Mar 27, 2026
ОГЛАС ЗА ЈАВНИ КОНСУЛТАТИВНИ СРЕДБИ
Се известуваат граѓаните дека во рамки на подготовката на проектната документација за Коридор 8 – делница на автопат Требеништа – Ќафасан, ќе се одржат јавни консултативни средби со цел обезбедување навремено, транспарентно и квалитетно вклучување на јавноста во процесот.
Целта на средбите е прибирање мислења, коментари и предлози од локалното население во рана фаза на подготовка на документацијата, со посебен осврт на:
- социјалните аспекти поврзани со реализацијата на проектот;
- идентификација, заштита и одржливо користење на културното наследство;
- можностите за активно учество на граѓаните во процесите на информирање и донесување одлуки.
Термини на одржување:
Општина Дебрца: 31.03.2026 (вторник) во 10:00 часот, во просториите на старото Основно Училиште во с. Волино
Општина Струга: 31.03.2026 (вторник) во 12:00 часот
Средбите се однесуваат на жители од следните населени места:
Општина Струга: Мислешево, Мороишта, Драслајца, Враништа, Корошишта, Ливада, Заграчани, Шум, Вишни, Радолишта, Калишта, Франгово, Радожда, Делогожда
Општина Дебрца: Требеништа, Волино, Горенци
Се покануваат сите заинтересирани граѓани да присуствуваат и активно да се вклучат со свои мислења и предлози.
Mar 27, 2026
Министерството за животна средина и просторно планирање во соработка со општинa Дебрца, Ве поканува да присуствувате на јавна расправа по Нацрт Закон за прогласување на Белчишко Блато за заштитено подрачје во категорија IV – Парк на природа.
Јавната расправа ќе биде организирана на 07 Април 2026 (вторник), со почеток во 11:00 – 13:15 часот во сала на состаноци во општина Дебрца.
Нацрт Закон за прогласување на Белчишко Блато за заштитено подрачје во категорија IV – Парк на природа е објавен на Единствениот национален електронски регистар на прописи во Република Северна Македонија (www.ener.gov.mk) и на веб страната на Министерство за животна средина и просторно планирање (www.moepp.gov.mk).
Коментари/мислења/сугестии по Нацрт Закон за прогласување на Белчишко Блато за заштитено подрачје во категорија IV – Парк на природа може да доставите писмено до Министерство за животна средина и просторно планирање на следнaва поштенска адреса: Плоштад „Пресвета Богородица“ бр. 3, 1000 Скопје како и на следнава емаил адреса infoeko@moepp.gov.mk, најкасно 10 дена по одржување на јавната расправа.
Ве молиме Вашето учество на јавната расправа да го потврдите на следната електронска адреса: skj.mzspp@gmail.com или кај Дијана Соколовска на: +389 76 233 020.
Дневен ред
07 Април 2026
Сала за состаноци – Општина Дебрца
| 11:00- 11:15 |
Отварање на јавната расправа
Модератор Даниел Ристески |
| 11:15-11:25 |
Обраќање на висок претставник од Министерство за животна средина и просторно планирање |
| 11:25:11:35 |
Обраќање на Градоначалник на Општина Дебрца
Златко Сиљаноски
|
| 11:35:12:00 |
Природни вредности, категорија на заштита, предлог граници и предлог зони на Белчишко Блато за заштитено подрачје во категорија IV – Парк на природа
Преставник од Здружение за екологија и туризам ЕКОТУРИЗАМ 2016 Ѓоко Зоровски –
|
| 12:00-12:20 |
Постапка за прогласување на Белчишко Блато за заштитено подрачје во категорија IV – Парк на природа и Нацрт на Белчишко Блато за заштитено подрачје во категорија IV – Парк на природа
Претставник од Министерство за животна средина и просторно планирање
|
| 12:20- 13:00 |
Дискусија
|
| 13:00-13:15 |
Затварање на јавната расправа
Модератор |
Mar 26, 2026
Денес во Општина Корча, Република Албанија, заедно со Општина Колоња и Музејот „д-р Никола Незлобински“ од Струга, потпишавме значаен Меморандум за соработка.
Со заедничка проектна документација и партнерски пристап, ќе аплицираме за проект во рамки на ИПА 3 програмата, со цел да придонесеме кон унапредување на културниот развој на Општина Дебрца. Оваа иницијатива претставува важен чекор кон зајакнување на регионалната соработка и афирмација на нашето културно наследство.
Верувам дека преку вакви иницијативи ќе создадеме нови можности за развој, размена на искуства и збогатување на културниот живот за сите наши граѓани.
Mar 25, 2026
На брегот на Охридското Езеро кај селото Оровник започнавме историска еколошка акција за чистење на плажата „Дебрца“.
Заедно со нашите партнери, ја покажавме силата на заедништвото: Општина Дебрца, АКВАТЕК Охрид, Воден Свет Преспа Охрид и СОС Балкан Медиа Охрид – обединети со една цел – зачувување на нашето езеро.
Оваа акција е резултат на силна лична заложба и јасна визија – екологијата да не биде само збор, туку конкретна акција со долгорочно влијание.
Сликата која ја затекнавме беше загрижувачка – пластика, гуми, текстил и разновиден отпад распослан долж целиот брег, дел и во самото езеро, како директна закана за биодиверзитетот.
Само во првиот ден успеавме да собереме над 12 кубни метри отпад – јасен доказ дека кога се работи заедно, резултатите се видливи.
Охридското Езеро е светско природно наследство на УНЕСКО и наша должност е да го заштитиме и сочуваме за идните генерации.
Утре продолжуваме со уште поважен чекор – за прв пат во историјата на Општина Дебрца ќе се реализира подводно чистење на дното на езерото кај оваа плажа.
Плажата „Дебрца“ кај Оровник има огромен потенцијал – природна убавина, мирна околина и уникатен поглед кон аеродромот „Свети Апостол Павле“ – простор кој заслужува да стане нова туристичка атракција.
„Охридското Езеро е природно наследство на целото човештво. Наша должност е да го предадеме почисто отколку што го добивме.“
Ова не е еднократна акција – ова е почеток на нова ера за плажата „Дебрца“ и за нашата општина.
Благодарност до сите вклучени – ова е пример како се гради иднината!
Feb 13, 2026
Ја информираме јавноста дека е во тек постапка за донесување на закон и официјално прогласување на Белчишко Блато (Сини Вирој) за заштитено подрачје во категорија IV- Парк на природата.
Овој значаен природен локалитет претставува едно од ретките зачувани блатни подрачја во државата, со богата биолошка разновидност, специфичен екосистем и големо значење за заштита на птици, растителни видови и водни живеалишта. Со прогласувањето за парк на природата ќе се обезбеди долгорочна заштита, унапредување и одржливо управување со просторот, во интерес на сегашните и идните генерации.
Постапката се спроведува во согласност со важечките законски прописи, при што ќе бидат вклучени релевантни институции, стручна јавност и локалната заедница. Целта е да се воспостави јасна рамка за заштита, контрола на активности и поттикнување на еколошки одржлив туризам.
Со овој чекор се прави значаен придонес кон зачувување на природното наследство и унапредување на еколошката свест.
Во постапката поврзана со изработка на предлог Законот се предвидени следните активности:
Јавно известување кое се објавува на интернет страната на Министерството за животна средина и просторно планирање (
www.moepp.gov.mk) и на ЕНЕР – Единствен национален електронски регистар на прописи на РСМ Македонија http: //www.ener.gov.mk
Рокот за јавни консултации со засегнатите страни и граѓаните на Република Северна Македонија за доставување на коментари, мислења и предлози трае 20 дена од денот на објавувањето на содржината на предлог на законот на веб страната на Единствениот национален електронски регистар на прописи.
Во текот на постапката може да бидат организирани директни консултации и состаноци со засегнатите страни како и јавна расправа доколку е потребно.
Вашите забелешки, мислења и предлози за предлог текстот на Законот може да ги доставите електронски на следниот e-mail:
Билјана Тешева Ѓорѓиевска: b.tesheva@moepp.gov.mk,
Влатко Трпески: v.trpeski@moepp.gov.mk и
Кузман Куновски: k.kunovski@moepp.gov.mk .
Воедно, забелешките, мислењата и предлозите по предлог текстот на Законот може да се дадат и на веб порталот ЕНЕР (http: //www.ener.gov.mk/).
Учеството на јавноста е од особено значење за обезбедување квалитетна и одржлива заштита на Белчишко Блато, која ќе ги земе предвид природните вредности, но и интересите на локалното население.
Министерството ги охрабрува сите засегнати страни да се вклучат и да придонесат кон заедничка цел – зачувување на природното наследство за сегашните и идните генерации.
Macedonian
Albanian
Dutch
English
French
German
Greek
Polish
Serbian
Turkish