Jul 17, 2026
ЈП за комунална дејност Дебрца ги известува корисниците дека е пуштен во употреба нов систем за електронска наплата на комунални услуги преку веб-страницата на претпријатието.
Преку системот за е-наплата, корисниците можат брзо и едноставно да ги платат своите фактури online со внесување на бројот на фактурата и e-mail адреса.
Доколку корисникот не го знае бројот на фактурата, информации може да добие на телефонскиот број 046/286-887 или писмено на e-mail адресата komunalecdebrca@hotmail.com.
На веб-страницата https://jkpdebrca.mk/ се достапни детални упатства за:
користење на системот за е-наплата;
преглед и плаќање на неплатени фактури;
внесување на состојба на водомер;
пријава за електронски прием на фактури.
Со воведувањето на оваа услуга, ЈП за комунална дејност Дебрца продолжува со дигитализација на услугите и подобрување на квалитетот на услугите за граѓаните, овозможувајќи побрз, поедноставен и подостапен начин за комуникација и плаќање на обврските.
Jul 14, 2026
Денес во просториите на Општина Дебрца имав чест и огромно задоволство да го пречекам нашиот драг пријател и почесен гостин, г-дин Зоран Ќосески, почесен конзул на Македонија во Перт, Австралија.
Оваа средба беше одлична можност да поразговараме за улогата на нашата дијаспора и нејзиниот непроценлив придонес кон татковината. Општина Дебрца има особена почит кон г-дин Ќосески, кој на дело ја покажува својата поддршка за нашиот крај, вклучително и преку хуманитарните иницијативи и значајните донации за нашите ученици од ООУ „Дебрца“ и за самата општина.
Во мое лично име и во име на сите граѓани, изразив најискрена благодарност за неговата несебична посветеност, континуираниот ангажман и заложбите за зачувување на македонскиот идентитет и продлабочување на врските со нашите иселеници.
Остануваме посветени на негувањето на овие цврсти мостови на соработка и реализација на идни заеднички проекти. Вратите на Општина Дебрца секогаш ќе бидат ширум отворени за нашите искрени пријатели.
Jul 14, 2026
Денеска имав чест да остварам средба со Амбасадорот на Република Австрија во нашата држава, Н. Е. Мартин Памер.
На состанокот разговаравме за зајакнување на соработката помеѓу Општина Дебрца и австриската покраина Тирол. Оваа пријателска покраина веќе има дадено значаен придонес за нашата заедница преку донацијата на возило и опрема за потребите на ДПД Ентузијаст во Дебрца, поддршка за која сме особено благодарни.
Дополнително, разменивме конструктивни идеи за воспоставување на поблиска соработка во повеќе општествени сфери. Нашата цел е преку размена на добри практики и заеднички иницијативи да придонесеме за развојот на нашата општина.
Продолжуваме да градиме силни меѓународни партнерства во интерес на граѓаните!
Jul 8, 2026
Почитувани сограѓани, уште едно ветување станува реалност!
Денес успешно го завршивме асфалтирањето на сретселото во с. Врбјани.
Поставени се вкупно 500м2 асфалт.
Овој проект е реализиран исклучиво со средства од сопствениот буџет на општина Дебрца.
Со ова уредување значително го олеснуваме секојдневието и обезбедуваме подобри услови за сите жители.
Нашата визија е јасна – рамномерен развој и вложување во секое населено место.
Не застануваме тука, механизацијата оди понатаму.
Продолжуваме да работиме посветено, транспарентно и домаќински за нашата Дебрца!
Jul 6, 2026
Во Општина Дебрца денес официјално беше извршен прием на нов трактор и дополнителна механизација, набавени во рамки на проектот „Опремување на ЈКП Дебрца“, кој се реализира преку Центарот за развој на Југозападниот плански регион, со поддршка од Министерството за локална самоуправа.
На приемот присуствуваа градоначалникот на Општина Дебрца, Златко Сиљаноски, и директорот на Центарот за развој на Југозападниот плански регион, Валон Каба, кои ја истакнаа важноста на меѓуинституционалната соработка за унапредување на комуналните услуги во општината.
Во рамки на проектот се набавени:
Трактор,
Нож за чистење снег,
Тракторска хидраулична рака со мулчер,
Пила за кастрење гранки.
Вкупната вредност на проектот изнесува 2.693.410 денари, при што од страна на Центарот за развој на Југозападниот плански регион, со поддршка од Министерството за локална самоуправа се одбезбедени 1.594.000 денари и Општина Дебрца обезбеди сопствено кофинансирање во износ од 1.099.410 денари.
Со новата механизација значително ќе се подобри работата на Општина Дебрца, особено во одржувањето на локалните патишта, чистењето на снег во зимски услови, уредувањето на јавните зелени површини и кастрењето на гранките.
Општина Дебрца и Центарот за развој на Југозападниот плански регион остануваат посветени на реализација на проекти што придонесуваат за подобар квалитет на живот и поефикасни јавни услуги за сите граѓани.
Jul 6, 2026
Врз основа на член 36 став 1 точка 15 од Законот за локалната самоуправа („Службен весник на РМ“, број 5/2002 и „Службен весник на РСМ“ бр. 202/24), член 17-а став 2 од Законот за Јавните претпријатија („Службен весник на РМ“ број 38/96, 9/97, 6/02, 40/03, 49/06, 22/07, 83/09, 97/10, 6/12, 119/13, 41/14, 138/14, 25/15, 61/15, 39/16, 64/18 и 35/19 и „Службен весник на РСМ“ бр. 275/19, 89/22, 274/22, 208/24 и 193/25), како и Правилникот за формата и содржината на Јавниот повик за пројавување на интерес за пријавување на кандидати за избор на член на Управен и Надзорен одбор на Јавно претпријатие, начинот на поднесување на пријавата, обрасците з пријавување и начинот на бодување и селекција на кандидатите („Службен весник на РСМ“ бр. 213/2024) и член 21 од Статутот на општината Дебрца („Службен гласник на општината Дебрца“, број 3/2005), а по предлог на Градоначалникот, Советот на општината Дебрца, објавува :
ЈАВЕН ПОВИК
за пројавување на интерес за пријавување на кандидати за избор на членови на Управен одбор на ЈПКД „Дебрца“ с.Белчишта
- Предмет на Јавниот повик
Предмет на Јавниот повик е спроведување на постапка за избор на членови на Управен одбор на ЈПКД „Дебрца“ с.Белчишта.
Постапката ќе се спроведе согласно Правилникот за формата и содржината на јавниот повик за пројавување интерес за пријавување на кандидати за избор на членови на Управен и надзорен одбор на Јавно претпријатие, начинот на поднесување на пријавата, обрасците за пријавување и начинот на бодување и селекција на кандидатите („Службен весник на РСМ“ број 213/2024)
- Право на учество
Право на учество имаат сите лица кои ќе пројават интерес за пријавување на кандидати кои ги исполнуваат условите во Јавниот повик.
Јавниот повик со сите услови се објавува на веб страната на Општина Дебрца www.debrca.gov.mk и на веб страната на ЈПКД „Дебрца“.
- Услови кои треба да се исполнат согласно Законот за Јавни претпријатија
За члено на Управен одбор на ЈПКД „Дебрца“ с.Белчишта може да биде лице кое ги исполнува следните услови :
– е државјанин на Република Северна Македонија ;
– има стекнато најмалку 240 кредити според ЕКТС или завршен VII/1 степен образование ;
– во моментот на именувањето со правосилна судска пресуда не му е изречена казна или прекршочна санкција забрана за вршење на професија, дејност, должност.
Членовите на Управниот одбор на ЈПКД „Дебрца“ с.Белчишта, треба да имаат најмалку 5 години работно искуство, и тоа :
– најмалку еден член на Управниот одбор со работно искуство од областа на финансиско работење и
– најмалку еден член на Управниот одбор со работно искуство од областа на правните работи.
- Начин на пријавување на Јавниот повик
Со пријавата заинтересираните кандидати задолжително треба да ја достават следната документација :
– Образец за пријавување ;
– Кратка биографија ;
– Уверение за државјанство ;
– Уверение или диплома за завршено високо образование и стекнати најмалку 240 кредити според ЕКТС или завршен VII/1 степен образование ;
– Доказ дека во моментот на именување со правосилна судска пресуда не му е изречена казна или прекршочна санкција забрана за вршење професија, дејност или должност ;
– Доказ дека има најмалку пет години работно искуство од Фондот на пензиско и инвалидско осигурување на РСМ ;
– Сертификати, лиценци, уверенија, дипломи издадени од овластени, односно акредитирани институции за нивно издавање согласно закон.
Документите треба да бидат поднесени во оригинал или копија заверена на нотар и истите се доставуваат до архивата на општина Дебрца с.Белчишта, со назнака : За Јавен повик за пројавување интерес на кандидати за избор на членови на Управен одбор на ЈПКД „Дебрца“ с.Белчишта.
- Рок на пријавување
Јавниот повик се објавува на ден 06.07.2026 година и трае 5 (пет) дена, односно најдоцна до 10.07.2026 година.
Непополнетата пријава како и некомплетна докуентација и документација доставена по истекот на рокот за аплицирање нема да биде разгледувана.
СОВЕТ НА ОПШТИНА ДЕБРЦА
ПРЕТСЕДАТЕЛ НА СОВЕТ НА ОПШТИНА
Иван Стрезоски
Macedonian
Albanian
Dutch
English
French
German
Greek
Polish
Serbian
Turkish