Aug 1, 2026
ПОДГОТВЕНИ ЗА ИЛИНДЕН: Чисти, уредени и безбедни патишта низ населените места во Дебрца!
Најголемиот македонски празник, симболот на нашиот непокор и традиција, го пречекуваме онака како што најдобро умееме – работно и на терен!
За поголема безбедност во сообраќајот и уреден лик на нашата општина, овие денови интензивно вршиме расчистување на крајпатната вегетација и проширување на банкините низ нашите населени места.
Активностите се одвиваат во:
Оровник
Мешеишта
Лактиње
Годивје
Врбјани
Сливово
Мраморец
Турје
Во пресрет на чествувањата, целосно е прочистен и уреден патот кон Илинска Планина преку село Брежани (до храмот Св. Илија). Со ова обезбедуваме непречен и безбеден пристап за сите верници, посетители и љубители на природата кои ќе го одбележат празникот на ова свето место.
Секој изминат ден, секој реализиран проект е доказ за нашата грижа. Секој ден е посветен на нашата Дебрца и на секој еден нејзин жител!
Aug 1, 2026
ТРАДИЦИЈАТА ПРОДОЛЖУВА: ДЕБРЦА ГО НЕГУВА ИЛИНДЕНСКИОТ ДУХ!
Денеска, со огромна чест и гордост, како градоначалник ја пречекав Илинденската коњаница во нашето историско село Сливово.
Оттука, заедно со коњаниците продолживме кон селото Лактиње. Во знак на длабока почит кон нашите предци и херои, кои низ историјата се бореа за слободна Македонија, положивме свежо цвеќе на спомен-обележјата. Славната Дебрца секогаш памети и почитува!
Утрото го одбележавме во вистински македонски дух – со заеднички појадок во Лактиње, каде преку топол разговор и нашето познато гостопримство ги испративме храбритите момци да го продолжат својот марш кон селата Збажди и Локов.
Патувајте со здравје јунаци, нека ве прати добра мисла! А ние, се гледаме веќе утре во селата Волино и Требеништа, каде повторно заеднички ќе ја славиме традицијата и ќе му оддадеме чест на празникот.
Да ни е вечна Дебрца!
Да ни е вечна Македонија!
Aug 1, 2026
Денеска, во присуство на нашиот почесен конзул во Перт, Австралија, г-дин Зоран Ќосески, примивме донација која навистина топли срца.
Сите наши 17 првачиња добија прекрасни, целосно опремени училишни ранчиња со сиот потребен прибор за успешен старт на нивната најубава животна авантура!
Ова е дело на г-дин Драган Капинков, наш иселеник по потекло од битолско Цапари кој живее во Перт. Неговата хуманост кон Дебрца не е од вчера – таа трае со години, докажувајќи дека растојанието не значи ништо кога желбата да се помогне е искрена. Од мое лично име и од името на цела Дебрца, упатувам огромна благодарност до него и неговото семејство. Вие сте вистински пример за добрина и човечност!
Но, тука не застануваме! Општина Дебрца стои цврсто зад своите граѓани. Покажуваме на дело дека инвестицијата во нашите деца е најважниот приоритет. Со огромно задоволство сакам да ве информирам дека од буџетот на општината оваа година реализираме пакет мерки кои директно го олеснуваат буџетот на секое семејство:
10.000 денари еднократна финансиска поддршка за секое запишано прваче!
Целосно обезбеден и бесплатен превоз за нашите ученици!
ЗА ПРВПАТ ВО НАШАТА ОПШТИНА: Бесплатни училишни униформи за сите 178 ученици од прво до деветто одделение! Секое дете добива целосен, квалитетен комплет кој вклучува: 4 маици, 2 блузони со долги ракави и 2 дуксери!
Парите на граѓаните ги враќаме назад кај граѓаните – таму каде што се најпотребни!
Продолжуваме да создаваме модерно, еднакво и квалитетно образование за секое дете.
Jul 31, 2026
ЈП за комунална дејност Дебрца ги известува жителите на населените места Оровник и Горенци дека, поради неработниот ден 03.08.2026 година (понеделник), редовно подигање на комуналниот одпад нема да се изврши според вообичаениот распоред.
Подигање на одпадот ќе се изврши во Вторник,04.08.2026 година
Ви благодариме на разбирањето
Jul 27, 2026
Врз основа на член 39 став 2 од Законот за локалната самоуправа (“Службен весник на РМ”, број 5/2002) и член 22, став 2 од Статутот на општината Дебрца (“Службен гласник на општината Дебрца”, број 3/2005), донесувам:
Р Е Ш Е Н И Е
за свикување на 15-та седница на Советот на општината Дебрца
Ја свикувам 15-та седница на Советот на општината Дебрца. Седницата ќе се одржи на ден 31.07.2026 година (петок) , со почеток во 13.00 часот, салата за седници на Советот на општината Дебрца.
За седницата се предлага следниот:
Д Н Е В Е Н Р Е Д
- Усвојување на записник од 14-та седница на Советот на општина Дебрца
- Предлог – Одлука за усвојување на Извештајот за остварување на Буџетот на општината Дебрца за периодот од 01.01.2026 до 30.06.2026 година
- Предлог – Одлука за усвојување на Годишен план за вработување на ООУ „Дебрца“ с.Белчишта
- Предлог – Одлука за прифаќање на предлогот и утврдување предлог за воспоставување на меѓуопштинска соработка со општина Струга
- Предлог – Решение за именување членови на заедничка комисија за воспоставување на меѓуопштинска соработка со општина Струга
- Предлог – Одлука за определување на широчината на крајбрежниот појас на водотекот Река Сатеска во населено место с.Ново Село
СОВЕТ НА ОПШТИНА ДЕБРЦА
Претседател,
Иван Стрезоски
Jul 27, 2026
Во селото Годивје успешно заокруживме едно навистина големо и благодетно дело, кое претставува важен чекор кон подобрување на животниот стандард на мештаните.
По цели децении чекање и слушање празни ветувања во минатото, конечно го асфалтиравме патот што води до селската црква „Св. Ѓорѓија“, овозможувајќи им на верниците и на сите посетители достоинствен и лесен пристап до овој значаен духовен храм.
Нашите градежни активности не застанаа само на тоа, па во рамки на овој инфраструктурен зафат целосно го асфалтиравме и сретселото, како и потегот, односно улицата која се протега од самиот центар на селото па сè до месноста Горна Река.
Вложувањето во патната мрежа во нашите рурални средини е единствениот вистински начин да им ги обезбедиме на граѓаните основните услови кои ги заслужуваат и да го олесниме нивното секојдневно функционирање.
Како локална самоуправа остануваме максимално посветени на рамномерниот развој на секое населено место, бидејќи Дебрца мора да оди напред преку реализација на реални проекти кои трајно го решаваат проблемот на жителите.
Macedonian
Albanian
Dutch
English
French
German
Greek
Polish
Serbian
Turkish