Jan 22, 2026
Денес во Битола се одржа првата работна седница на Меѓуопштинскиот одбор за управување со отпад (МОУО) за Пелагонискиот и Југозападниот регион, со што започна оперативната фаза и исполнувањето на обврските од регионалниот систем за управување со отпад.
На седницата, на која учествуваа сите 18 градоначалници од двата региони во својство на членови на Одборот, како и претставници на Министерството за животна средина и просторно планирање и меѓународните партнери, беа разгледани клучните активности што ќе го одбележат периодот што следи и ќе го насочат понатамошниот развој на регионалниот систем.
На состанокот беше истакнато дека воспоставувањето на МОУО е резултат на повеќегодишна координирана работа на општините од двата региона, институциите и меѓународните партнери, и претставува важен чекор кон создавање модерен, ефикасен и одржлив систем за управување со отпад.
Во рамки на седницата беше презентирана и новата веб-платформа „Регион без отпад“, која е во изработка, а која ќе служи како централно место за информации, координација и транспарентна комуникација со јавноста, како и за следење на работата на МОУО и напредокот на регионалниот систем.
Посебен акцент беше ставен на планираните активности за првата половина на 2026 година, меѓу кои се изградбата на претоварни станици и набавка на возила и опрема, изработката на новиот Регионален план за управување со отпад, формирање на регионалното комунално претпријатие, зајакнување на комуникацијата со граѓаните, собирање и управување со податоци за отпадот, како и јасно дефинирање на обврските на општините во процесите.
Членовите на Одборот истакнаа дека наредниот период ќе биде клучен за поставување стабилни основи за функционален систем кој ќе обезбеди подобри и поефикасни услуги за граѓаните, поголема заштита на животната средина и зголемена институционална одговорност.
Со оваа седница, МОУО ја потврди својата улога како клучно тело за координација, планирање и надзор на реформите во управувањето со отпад во двата региони, со јасна заложба за транспарентност, соработка и вклучување на јавноста во процесите што следуваат.
Работата на Меѓуопштинскиот одбор за управување со отпад е поддржана од проектот „Одржливо управување со отпад на локално ниво“, финансиран од Шведска и имплементиран од SALAR International, во соработка со општините и националните институции.
Jan 21, 2026
Почитувани сограѓани на Општина Дебрца, сакам да Ве известам дека општината е целосно исчистена од снежната покривка што нè затекна изминатата ноќ.
Уште од 3 часот наутро екипите беа на терен – подготвени, организирани и на нозе, како што доликува.
На осојничавите и критични места е фрлена сол и ризла, за поголема безбедност на патиштата.
Сепак, поради ниските температури, апелирам до сите граѓани да користат зимски гуми и да возат со прилагодена брзина.
Да се чуваме еден со друг – со малку внимание, зимата полесно се минува!
Jan 14, 2026
И Оваа година Василица по традиција беше одбележана во општината Дебрца, најсреќен меѓу нас беше Даниел Паункоски кај кого заврши паричката – знак на среќа, здравје и бериќет.
Со тоа, тој го презеде кумството од поранешниот кум,а од целиот колектив доби пригодни подароци како знак на почит и чест.
Му честитаме од срце и му посакуваме здравје, успех и радост, а кумството да му донесе само убавини.
За многу години Свети Василиј – Василица!“
Jan 12, 2026
ОПШТИНА ДЕБРЦА
Врз основа на член 22 став 1 точка 13 и член 50 став 1 точка 16 од Законот за локална самоуправа („Сл. весник на Р.М.“ бр. 5/02) и член 15 став 1 точка 13 од Статутот на Општина Дебрца („Сл. гласник на општина Дебрца“ бр. 3/2005), Градоначалникот на Општина Дебрца објавува:
ЈАВЕН ПОВИК
ЗА СУБВЕНЦИОНИРАЊЕ НА ДЕЛ ОД ТРОШОЦИТЕ ЗА ПОЛАГАЊЕ НА ВОЗАЧКА ДОЗВОЛА Б КАТЕГОРИЈА
ОПШТИ ИНФОРМАЦИИ
Преку мерката за субвенционирање на дел од трошоците за полагање на возачка дозвола Б категорија општина Дебрца има намера да помогне на младите жители од општината да го завршат полагањето на практичниот и теоретскиот дел од испитот за возачи и со тоа да се стекнат со возачка дозвола од Б категорија. Имајќи ја во предвид економската состојба и можностите на жителите, оваа мерка директно е насочена кон младите луѓе и нивните семејства од една страна и зголемување на безбедноста во сообраќајот и намалување на појавата на управување на моторно возило без да се поседува соодветна возачка дозвола од друга страна.
Согласно законската регулатива а во согласност со донесената програма за локален економски развој на општина Дебрца за 2026 година, Општина Дебрца како единица на локалната самоуправа води активна политика на силна финансиска поддршка за младите луѓе и активно ги следи и работи на остварување на нивните потреби.
ПРАВО НА УЧЕСТВО НА ЈАВНИОТ ПОВИК
Млади луѓе, жители на општина Дебрца кои во моментот на поднесување на барањето за субвенционирање не навршиле 21 година;
НАЧИН НА АПЛИЦИРАЊЕ И РОК ЗА ПОДНЕСУВАЊЕ НА ПРИЈАВИТЕ
Пријавувањето на Јавниот повик се врши со доставување на барање кое се подигнува од Архивата на општина Дебрца или од веб страната на општина Дебрца: www.debrca.gov.mk;
Пријавите со документите се доставуваат во затворен коверт: Општина Дебрца с. Белчишта, со назнака за: „Јавен повик за субвенционирање на дел од трошоците за полагање на возачка дозвола Б категорија“ – лично во архивата на Општина Дебрца.
Јавниот повик ќе трае од 01.01.2026 година во текот на целата година.
Во прилог на пријавата барателите се должни да ја обезбедат и следнава
документација:
- Копија од лична карта;
- копија од фискална сметка за извршена уплата во автошкола;
- Копија од новоиздадена возачка дозвола;
- Копија од трансакциска сметка;
КРИТЕРИУМИ ЗА ФИНАНСИРАЊЕ
Мерката е наменета за сите жители на општина Дебрца кои во моментот на аплицирање не навршиле 21 година без оглед на нивниот социјален статус и економската состојба на семејството и се исплаќа еднократно по 20.000 денари по апликант по завршен процес на полагање на возачки испит за Б категорија.
ИЗВЕСТУВАЊЕ ЗА РЕЗУЛТАТИТЕ ОД ЈАВНИОТ ПОВИК
Одобрените барања за финансирање ќе се обработуваат и исплаќаат тековно веднаш после поднесено барање а заради транспарентност на процесот ќе бидат јавно објавени на веб страната на општина Дебрца: www.debrca.gov.mk, на крајот од 2026 година. Средствата за реализација на овие активности се предвидени во рамки на Програмата за локален и економски развој на општина Дебрца за 2026 година.
ДОПОЛНИТЕЛНИ ИНФОРМАЦИИ
Дополнителни информации во врска со Јавниот повик може да се добијат на тел: 046/286-855.
Прилог:барање возачки
ОПШТИНА ДЕБРЦА
Градоначалник
Златко Сиљаноски
Jan 12, 2026
ОПШТИНА ДЕБРЦА
Врз основа на член 22 став 1 точка 3 и член 50 став 1 точка 16 од Законот за локална самоуправа („Сл. весник на Р.М.“ бр. 5/02) и член 15 став 1 точка 3 од Статутот на Општина Дебрца („Сл. гласник на општина Дебрца“ бр. 3/2005), Градоначалникот на Општина Дебрца објавува:
ЈАВЕН ПОВИК
ЗА СУБВЕНЦИОНИРАЊЕ НА ПРОДАВНИЦИ НА ТЕРИТОРИЈАТА НА ОПШТИНА ДЕБРЦА ЗА 2026 ГОДИНА
ОПШТИ ИНФОРМАЦИИ
Преку мерката за субвенционирање на дел од трошоците на економските субјекти кои се занимаваат со малопродажба на територијата на општина Дебрца, општината има за цел да го помогне економскиот развој во населените места, да овозможи подобри и полесни услови за живот на своите граѓани притоа исполнувајќи го барањето на своите жители за отворање на што е можно повеќе продавници на територијата на општина Дебрца. Оваа мерка ќе придонесе и за отворање на нови работни места што секако е стратешки приоритет на општината.
Согласно законската регулатива а во согласност со донесената програма за локален економски развој на општина Дебрца за 2026 година, Општина Дебрца како единица на локалната самоуправа води активна политика на силна финансиска поддршка на економските субјекти кои работат или имаат желба да работат на територијата на општина Дебрца.
ПРАВО НА УЧЕСТВО НА ЈАВНИОТ ПОВИК
Правни лица со седиште во општина Дебрца кои отпочнале да вршат дејност трговија на мало на територијата на општина Дебрца, или правни лица кои отвориле подружници во општина Дебрца преку кои вршат дејност трговија на мало;
НАЧИН НА АПЛИЦИРАЊЕ И РОК ЗА ПОДНЕСУВАЊЕ НА ПРИЈАВИТЕ
Пријавувањето на Јавниот повик се врши со доставување на барање кое се подигнува од Архивата на општина Дебрца или од веб страната на општина Дебрца: www.debrca.gov.mk;
Пријавите со документите се доставуваат во затворен коверт: Општина Дебрца с. Белчишта, со назнака за: „Јавен повик за субвенционирање на продавници на територијата на општина Дебрца за 2026 година“ – лично во архивата на Општина Дебрца.
Јавниот повик ќе трае од 01.01.2026 година во текот на целата година.
Во прилог на пријавата барателите се должни да ја обезбедат и следнава
документација:
- Тековна состојба од Централен регистар не постара од 6 (шест) месеци ;
- Уверение од Управа за јавни приходи за платени даноци и придонеси не постаро од 6 (шест) месеци ;
- Потврда од централен регистар или надлежен суд дека врз правното лице не е отворена стечајна или постапка за ликвидација, не постара од шест месеци;
4.Потврда од општина Дебрца за платен данок на имот, фирмарина и обврски произлезени од договор за закуп доколку правното лице има склучено договор за закуп со општина Дебрца на објект во кој ја врши дејноста;
- Изјава од одговорното лице на правниот субјект, под полна материјални, кривична и морална одговорност, заверена на нотар дека доколку престане со вршење на дејноста во текот на годината за која користи субвенција ќе ги врати сите дотогаш примени срества на сметката на општина Дебрца;
- Неколку фотографии од продавницата;
- Копија од жиро сметка;
КРИТЕРИУМИ ЗА ФИНАНСИРАЊЕ
Мерката е наменета за сите правни субјекти во општина Дебрца кои вршат дејност малопродажба преку отворени продавници во било кое населено место во општина Дебрца. И за новоотворените продавници на територијата на општина Дебрца важат истите правила и документација која се должни да ја достават откако продавницата ќе биде отворена. Општина Дебрца согласно буџетските можности има право за новоотворените продавници предност при финансирање да даде за оние населени мести каде за првпат се отвора продавница. Субвенцијата се исплаќа по завршување на секој месец за 12 месеци во текот на годината и изнесува по 10.000 денари по подносител на барање. Доколку еден правен субјект има повеќе продавници во различни населени места на територијата на општина Дебрца, субвенцијата му следува за секој од нив. Со секој добитник на субвенција ќе биде склучен посебен договор за регулирање на меѓусебните права и обврски.
ИЗВЕСТУВАЊЕ ЗА РЕЗУЛТАТИТЕ ОД ЈАВНИОТ ПОВИК
Одобрените барања за финансирање ќе се обработуваат и исплаќаат тековно веднаш после поднесено барање а заради транспарентност на процесот ќе бидат јавно објавени на веб страната на општина Дебрца: www.debrca.gov.mk, на крајот од 2026 година. Средствата за реализација на овие активности се предвидени во рамки на Програмата за локален и економски развој на општина Дебрца за 2026 година.
ДОПОЛНИТЕЛНИ ИНФОРМАЦИИ
Дополнителни информации во врска со Јавниот повик може да се добијат на тел: 046/286855.
Прилог:барање и изјава продавници (1)
ОПШТИНА ДЕБРЦА
Градоначалник
Златко Сиљаноски
Macedonian
Albanian
Dutch
English
French
German
Greek
Polish
Serbian
Turkish