Jun 1, 2026
Се известуваат корисниците кои имаат заостанат долг по основ на комунални услуги потребно е истите да ги подмират во рок од 5 дена од денот на објавување на ова соопштение.
Доколку обврките не бидат навремено регулирани, против должниците ќе биде поведена постапка за присилна наплата согласно важечките прописи.
Ги повикуваме должниците навремено да ги регулираат своите обврски или да се обратат во јавното претпријатие во с.Мешеишта за отплата на рати, со цел избегнување дополнителни трошоци и постапки.
ЈП за комунална дејност Дебрца
May 30, 2026
Општина Дебрца – горд домаќин на настан кој ги спојува традицијата, верата и младоста!
Во прекрасниот и духовен амбиент на манастирот „Св. Недела“ во селото Оровник, синоќа имавме чест да бидеме домаќини на еден навистина исклучителен настан. Се одржа свечена промоција и проекција на филмот „Приказна за една охридска свадба“, како и презентација на проектот „Светлина на верата“.
Овие значајни дела се реализирани од талентираните ученици од СОСУ „Св. Кирил и Методиј“ од Охрид, под менторство на професорките Маја Цветанова Терзиоска и Андријана Паскали, а претставуваат успешен заеднички проект поддржан од Општина Дебрца и Општина Охрид.
Филмот на прекрасен начин ја оживеа богатата традиција и обичаите на охридската свадба, додека проектот „Светлина на верата“ нè потсети на непроценливата духовна вредност на нашето православно наследство.
На наше огромно задоволство, свој благослов и присуство на настанот даде Неговото Високопреосвештенство Митрополитот дебарско-кичевски г. Георгиј, придружуван од потесниот круг на свештенството од Митрополијата.
На свеченоста присуствуваа и секретарот на Општина Охрид, Александар Китески, дел од администрацијата на Општина Охрид и Општина Дебрца, како и вие – нашите почитувани сограѓани од Дебрца кои дојдовте во навистина огромен број!
Вечерта беше збогатена со прекрасна културно-уметничка програма во која настапија културно-уметнички друштва од Охрид и Дебрца, млади уметници и музички ветерани.
Овој настан уште еднаш ја потврди важноста на вложувањето во младите и нивното активно вклучување во зачувувањето на нашите корени, преку проекти кои ги поврзуваат традицијата, образованието и современиот креативен израз.
Продолжуваме да ја негуваме нашата култура и традиција!
May 27, 2026
Со особена чест и задоволство Ве покануваме да присуствувате на настанот „Светлина на верата“, во чии рамки ќе се одржи и промоција на филмот
🎬 „Приказна за една Охридска свадба“.
Настанот има за цел да ја доближи духовната и културната традиција, како и богатото наследство на охридскиот крај преку уметност, музика и филмска приказна.
📅 Датум: 30.05.2026 (сабота)
🕖 Време: 19:00 часот
📍 Локација: Манастир „Св. Недела“ – Оровник
Во рамки на програмата се предвидени: • Отворање на настанот
• Презентација на проектот „Светлина на верата“
• Музички дел
• Премиера на филмот „Приказна за една Охридска свадба“
• Културно-уметничка програма
Проектите ги изработија учениците од СОСУ „Св. Кирил и Методиј“ – Охрид, со поддршка од Општина Охрид и Општина Дебрца.
Ментори на проектот се Маја Цветанова и Андријана Паскали.
Ги покануваме сите љубители на традицијата, културата и духовните вредности да бидат дел од оваа вечер исполнета со емоција, музика и македонско наследство.
May 26, 2026
Почитувани граѓани на Општина Дебрца, континуирано инвестираме во почиста животна средина!
Денеска имав чест да го потпишам договорот за реализација на новиот значаен проект за нашата општина.
Овој проект го реализираме во успешна соработка со Министерството за локална самоуправа, односно Бирото за регионален развој.
Станува збор за наменска инвестиција вредна 900.000,00 денари за набавка на нови канти за комунален отпад.
Секој чекор кон подобро управување со отпадот е чекор кон поубава и поздрава иднина за сите нас.
Благодарност до институциите за поддршката на нашите заложби за модерна и еколошки свесна Општина Дебрца.
May 26, 2026
Врз основа на член 39 став 2 од Законот за локалната самоуправа (“Службен весник на РМ”, број 5/2002) и член 22, став 2 од Статутот на општината Дебрца (“Службен гласник на општината Дебрца”, број 3/2005), донесувам:
Р Е Ш Е Н И Е
за свикување на 13-та седница на Советот на општината Дебрца
Ја свикувам 13–та седница на Советот на општината Дебрца.Седницата ќе се одржи на ден 22.05.2026 година (петок) , со почеток во 13.00 часот, салата за седници на Советот на општината Дебрца.
За седницата се предлага следниот:
Д Н Е В Е Н Р Е Д
- Усвојување на записник од 11-та седница на Советот на општина Дебрца
- Предлог – Одлука за усвојување на Елаборатот за процена на штета од природна непогода (МРАЗ) што ја зафати општина Дебрца на ден 07 и 08 април 2025 година
- Предлог – Одлука за усвојување на Извештајот за остварување на Буџетот на општина Дебрца за периодот од 01.01.2026 до 31.03.2026 година
- Предлог – Одлука за усвојување на Измени на Планот на развојни програми на општина Дебрца за 2025-2027 година
- Предлог – Измени и дополнувања на Буџет на ЕЛС Дебрца за 2026 година
- Предлог – Одлука за одобрување на Проектна Програма за изградба на покриено повеќенаменско спортско игралиште на КП 712/3 КО Оровник, Општина Дебрца
СОВЕТ НА ОПШТИНА ДЕБРЦА
Претседател,
Иван Стрезоски
Macedonian
Albanian
Dutch
English
French
German
Greek
Polish
Serbian
Turkish