Честитка од градоначалникот Ногачески по повод почетокот на учебната година

Sep 2, 2019

Денес во Основното училиште “Дебрца” ( централното училиште, подрачните училишта и подрачните паралелки ) започнува новата учебна година за 206 ученици, од кои 24 првачиња.
На учениците и наставниците им посакувам успешна учебна година.
Во оваа пригода сакам да потенцирам неколку мерки и активности кои како локална самоуправа планираме да ги имплементираме во текот на учебната година, а со цел унапредување на образовната инфраструктура, подобрување на квалитетот на образованието и мотивирање на учениците да постигнуваат високи резултати во образованието и тоа:

1. Инсталирање на централно греење во подрачните училишта во село Требеништа и село Мешеишта; (втора фаза)
2. ДОБРЕДОЈДОВТЕ ПРВАЧИЊА
   Пред првиот училиштен ден секое прваче доби училишен прибор.
3. БЕСПЛАТНА УЖИНКА ЗА СИТЕ УЧЕНИЦИ ВО ОСНОВНОТО ОБРАЗОВАНИЕ
   Сите ученици од I до IX одделение ќе добиваат бесплатна ужинка. Средствата за ужинката ќе ги обезбедува општината во годишниот буџет, а очекуваме да започне од средината на септември, по завршувањето на тендерската постапка која е во тек.
4. ГОДИШНА НАГРАДА ЗА ПРВЕНЕЦ НА ГЕНЕРАЦИЈА И УЧЕНИЦИ НА ГЕНЕРАЦИЈА
   Општината ќе обезбеди парична награда за најдобрите ученици од четирите подрачни основни училишта во општината, од кои ќе се избира еден првенец на генерација и тројца ученици на генерацијата .
5. ПОДДРШКА ЗА ТАЛЕНТИРАНИТЕ УЧЕНИЦИ
   Општината ќе ги покрива сите трошоци за учество на талентираните ученици на меѓуопштински, државни и натпревари во странство.
6. БЕСПЛАТНА УЧЕНИЧКА ЕКСКУРЗИЈА
   За учениците од I до IX одделение општината ќе ги покрие трошоците за еднодневен излет , еднаш во текот на учебната година.
7. СУБВЕНЦИОНИРАН ОПШТИНСКИ ПРЕВОЗ
   Општината ќе им ги субвенционира трошоците за користење на општинскиот линиски превоз на сите ученици кои посетуваат дополнителна настава во приватните образовни центри.
8. ПАРТИЦИПАЦИЈА НА РОДИТЕЛИТЕ ВО РАБОТАТА НА УЧИЛИШТЕТО
   Општината ќе соработува со советот на родители и училишниот одбор преку непосредни средби со претставниците на тие органи, најмалку два пати во текот на учебната година .

Благодарност од градоначалникот Ногачески до сите кои помогнаа во гаснење на пожарот во Велмеј

Aug 16, 2019

Пожарот во атарот на село Велмеј е изгаснат.
Сакам да изразам голема благодарност до сите кои активно или на друг начин се вклучија во гаснењето на истиот, а особено до:
– вработените во Национални шуми Охрид, кои сите денови активно дејствуваа на терен,
– вработените во ТППЕ-Охрид, дел од јавните претпријатија во општина Охрид и јавното комунално претпријатие Дебрца,
– месното население и црковниот одбор,
– Дирекцијата за заштита и спасување, која на мое барање на два пати одобри користење на два ер трактори за гаснење од воздух,
– Центарот за управување со кризи и други чинители.
Пожарот остави несакани последици, но добро е што во ниту еден момент не беше загрозен животот на лицата активно вклучени во гаснењето , ниту беше непосредно загрозен животот и имотот на месното население. – кажа во своето обраќање градоналачникор Зоран Ногачески.

Ногачески со честитка по повод Курбан Бајрам

Aug 11, 2019

Честит Курбан Бајрам на сите припадници од исламска вероисповестВо мое име и во име на општина Дебрца, Ви го честитам Курбан Бајрам и Ви пожелувам добро здравје, многу радост и благосостојба.

Честитка од Градоначалникот Ногачески по повод Денот на Републиката

Aug 2, 2019

Почитувани граѓани,
Празникот Илинден е симбол на победата на македонскиот непокор, ден кога славиме и се потсетуваме на голем број револуционери и борци за независна Македонија, кои со својата крв ги испишаа најславните страници од историјата на македонскиот народ.
Празнувајќи го овој датум, да им се заблагодариме и да им оддадеме почит на сите знајни и незнајни херои од нашата историја, зошто врз темелите што тие ги поставија опстојува Република Македонија.
Да го чуваме аманетот од Илинденците и Асномците и да ги негуваме и надградуваме придобивките од двата Илиндена, да ги оставиме разликите, од каква природа и да се, да покажеме меѓусебна почит и да се свртиме кон заедничка иднина, достоинствен дом во кој има место за сите и да продолжиме посветено да работиме на изградба на модерно, просперитетно и европско општество.
Нека ни се честити и вековити двата Илиндена!

Честитка од градоначалникот Ногачески до полуматурантите

Jun 8, 2019

Учениците-полуматуранти од ОУ “Дебрца” вечерва ја имаат завршната полуматурска вечер.
Со завршувањето на 9-то одделение успешно заврши една фаза од Вашето образование, основното.
Сега сте пред нов предизвик, односно сте исправени пред избор со кој ќе треба да решите каде ќе се движат вашите професионални, а преку тоа и лични животи.
Средното училиште е од голема важност за секој ученик. Решението е во вашите раце и не се сомневам дека ќе го направите вистинскиот избор.
И притоа, и каде да го продолжите вашето образование, секогаш трудете се да постигнете најдобри резултати и да ги имате на ум познатите зборови на Нелсон Мандела, според кого, образованието е најсилното оружје со кое може да го промените светот.
Општина Дебрца секогаш ќе биде тука и со годишните образовни програми ќе ве поддржува како средношколци.
Честита полуматура и успех во средното образование.