Jun 10, 2024
Ванчо Николески (Црвена Вода, Општина Дебрца, 10 јуни 1912 – Црвена Вода, Дебрца, 15 април 1980) — македонски писател, претставник на првата повоена генерација македонски писатели за деца и младина.
Ванчо Николески е роден во селото Црвена Вода -Општина Дебрца. Основно училиште завршил во родното село, гимназија во Охрид, а учителска школа во Скопје. По завршувањето на учителска школа, тој учителствувал во многу села низ Македонија. По ослободувањето на Македонија, Николески работел како новинар и уредник на весникот „Титов пионер“ и во детските емисии на Радио Скопје и Радио Битола. Од 1950 година бил член на Друштвото на писателите на Македонија. Починал во Охрид, во 1980 година.
За своето книжевно творештво, Николески бил добитник на повеќе книжевни награди, меѓу кои и наградите: ,, 11 Октомври ,, Климент Охридски“ и „Младо поколение“.
Неговите дела се преведени на сите југословенски јазици, а тој самиот се занимавал со преведување од српски и од руски јазик
Во негова чест, Друштвото на писателите на Македонија ја доделува наградата ,, Ванчо Николески “ за книга за деца и млади.
Николески спаѓа во основоположниците на македонската книжевност за деца и нејзин најистакнат претставник во периодот непосредно по Втора светска војна. Своите први поетски творби ги објавил во детскиот весник ,, Титов пионер “ Негови најпознати дела се:
- „Македонче“ (прва збирка песни за деца на македонски јазик, 1946)
- „Мице“ (поема, 1947)
- „Школско ѕвонче“ (песни, 1947)
- „Прва радост“ (песни, 1947)
- „Бабино вретенце“ (песни, 1948)
- „Крај огниште“ (песни, 1948)
- „Дедови приказни“ (песни, 1950)
- „Шарено торбиче“ (песни, 1950)
- „Татковина“ (песни, 1950)
- „Мое село“ (песни, 1950)
- „Чуден свет“ (песни, 1952)
- „Чудотворен кавал (раскази, 1952)
- „Мојот ден“ (сликовница, 1952)
- „Стани, Коле“ (песни, 1952)
- „Братска дружба“ (приказни и бајки, 1953)
- „Четиринаесет илјади ослепени“ (историска поема за времето на Цар Самоил 1954)
- „Приказни и бајки за деца“ (1955)
- „Чудни случки“ (раскази, 1958)
- „Цвета смета“ (сликовница, 1960)
- „Волшебното самарче “ (роман, 1962)
- „Приказни од моето село“ (раскази, 1964)
- „Гоце Делчев “ (роман, 1964)
- „Чуден дедо“ (песни, 1964)
- „Под виорното знаме“ (роман, 1967)
- „Приказни од волшебната куќичка“ (раскази, 1970)
- „Малиот ловец“ (раскази, 1970)
- „Станко спанко“ (песни, 1972)
- „Ѕвездени вечери“ (песни, 1973)
- „Рачко плачко“ (песни, 1973)
- „Крвави години“ (хроника-роман)
- „Жива книга“ (раскази, 1978)
Општина Дебрца во негова чест во Спомен училиштето во село Црвена Вода е сместена Спомен собата на писателот Ванчо Николески со која се овозможува почитување на ликот и делото кој го остварил писателот, Ванчо Николески за Македонија како и непроценливите писателски дела и творештво со кои ја прават Општината Дебрца и селото Црвена Вода препознатливи.
Jun 7, 2024
Продолжуваме или започнуваме со годинешните планирани проекти,кои поради изборните правила беа во мирување или не можеа да започнат.
Деновиве продолживме или ќе започнеме со проектите,за кои се завршени постапките за јавни набавки.
Дел од нив се:
- Изградба на спортско игралиште и уредување на просторот кај споменикот во село Злести /проектот е во завршна фаза,
- Реконструкција на општинската зграда во село Белчишта /реконструкција на големата сала,административните простории,надворешна фасада и др.
- Реконструкција на објект-поранешна продавница во село Ботун/ проектот е во тек
- Реконструкција на кровната конструкција на Домот во село Годивје,
- Регулирање на канал за наводнување-одводнување во село Злести
- Заградување на училишниот двор во село Ботун
- Реконструкција на спортско игралиште во село Оровник
- Уредување на просторот кај чешмата во село Оровник
- Изградба на три канализациони краци во село Мешеишта,
- Набавка на нова пумпа и реновирање на стариот резервоар за водоснабдување во село Мешеишта
- Тампонирање на пат до црква Св.Димитрија во село Издеглавје,
- Тампонирање на пат до црква Св.Никола Талалеј во село Сошани
- Тампонирање на пат до црква Св.Атанасије, село Сливово
- Осветлување на светиот крст во црква Св Спас,село Велмеј
- Поставување на јавно осветлување на патниот правец село Требеништа-село Волино.
- Санација на рефлектори на спортските полигони
Во наредниот период,по завршување на тендерските постапки ќе започнеме и со други проекти.
Feb 22, 2024
Почеток на развој на првиот интегриран локален развоен план (ИЛРП), за период 2024 – 2027 година, беше означен во Општина Дебрца каде претставниците на SEG Holding пред градоначалникот на општината ја презентираа методологијата на изработка на мета-планот за развој на целата општина.
Положбата на Општина Дебрца дава голема можност за туристичко-рекреативни активности, притоа, водејќи сметка за зачувување на природата. ИЛРП ќе ги дефинира сите начини за одржливост на природните ресурси, обезбедување на услови за раст на бројот на туристите и задржување на луѓето во општината.
Оваа активност се спроведува во рамки на програмата „Зајакнување на општинските совети“, финансирана од Швајцарската влада преку Embassy of Switzerland in North Macedonia и Министерство за локална самоуправа а ја кофинансира и спроведува UNDP MK во соработка со национални и локални партнери.
#ЗајакнувањеНаОпштинскитеСовети #ГраѓанитеНаПрвоМесто #CHinMK #SDGs
Изработката на интегрираниот локален развоен план за општина Дебрца е прв стратешки документ кој се базира на инклузивен – партиципативен пристап на локалната лидерска група и трите носечки столба на локалниот економски развој- : приватниот, јавниот и граѓанскиот сектор. Четири годишната визија за развој на општина Дебрца се формира преку метод на анализа за конкретните проблеми, потреби и можности кај релевантните општествени чинители во општината. Така, преку прибирање на информации со методологија се формира база на потенцијални проекти од кои се формираат мерки и приоритети кои се групираат во стратешки цели чија реализација ќе претставува остварување на визијата за изгледот на општина Дебрца по истекот на 4 години.
Примарната цел на овој стратешки документ е разложување на визијата за просперитетна и економски силна општина на ниво на проекти, со што би се имал сеопфатен документ за презентација и промоција пред инвеститорите. Исто така, овој документ ќе послужи како база на проекти со кои би се аплицирало за грантови и донации пред домашни и странски институции и фондации. Оваа намена на интегрираниот локален развоен план е посебно важна за руралните и релативно финансиски слаби општини како општина Дебрца, кои повеќе од 90% од своите проекти ги реализираат преку грантови од надворешни донатори.
Sep 30, 2023
Во рамки на првата фаза од реконструкцијата на општинската зграда во село Белчишта се изврши санација и на Спомен собата од НОБ, која е во склоп на општинската зграда.
Деновиве активистите на Здружението на ветераните од одбраната и безбедноста извршија преуредување на Спомен собата и нејзино опремување со фото и друга документација и содржини, со што Собата доби нов лик.
Општина Дебрца, заедно со боречката организација, ветераните од одбраната и безбедноста и месните заедници продолжува да ги негува придобивките од НОБ, кои во најголем дел се исковани токму во Дебрца.
А најголемата придобивка е денешната наша држава, Асномска Македонија.
Aug 5, 2023
Вечерва свечено беше отворена Интернационалната Ликовна колонија “Дебрца” – Белчишта, нејзиното 38 мо издание, кое оваа година е посветено во сеќавање на Ѓорѓија Целески, основоположникот на ликовната колонија.
Градоначалникот Ногачески поздравувајќи ги учесниците на Ликовната колонија и присутните гости истакна дека 38–те години творештво на колонијата покажуваат дека Ликовната колонија “Дебрца” не е обичен културен настан, туку највисок културен дострел на Белчишта , како седиште на општината и на општина Дебрца.
Основоположниците на колонијата пред 40 тина години можеби и самите не биле свесни дека создале културна рожба , која денес е блескаво културно наследство и уметничките дела создадени на Ликовната колонија не се само наследство на Дебрца и Македонија, туку се светско културно наследство.
Општина Дебрца останува партнер на новото раководство на уметничката колонија во нејзините заложби да се врати стариот сјај на една од најстарите ликовни колонии во Македонија.
May 14, 2023
Стотина вљубеници на планинскиот велосипедизам, од цела Македонија ја започнаа Третата велосипедска тура во Дебрца, која годинава во организација на Здружението за планински велосипедизам Рупикапра МТБ Струга се вози по патеките на Караорман.
Во организација на здружението за планински велосипедизам Прв до врв Скопје, во 2019 година на Караорман и Славеј Планина се одржа првата велосипедска тура, а во 2021 втората велосипедска тура се возеше од село Годивје до Бабин Срт ( 2241 м.н.в. ) , врвот на Стогово и назад.
Градоначалникот Ногачески Поздравувајќи ги учесниците на денешната планинска велосипедска тура, посебно истакна дека општина Дебрца располага со доста неоткриени природни убавини, кои што се привлечни за љубителите на природата, екологисти, планинари, а во поново време и љубители на планински велосипедизам.
На учесниците им посака успешен настан, посебно да ја почуствуваат недопрената природа и притоа да се напојуваат од слободарскиот дух на овој крај.
Општина Дебрца во целост го поддржува овој спортско-рекреативен настан, бидејќи преку истиот се промовираат здравиот начин на живот, природните убавини, историското и културното наследство на Дебрца.
Macedonian
Albanian
Dutch
English
French
German
Greek
Polish
Serbian
Turkish