Работиме неуморно низ целата општина: Денешниот фокус е на Злести!

Jun 5, 2026

Денес завршивме уште еден важен дел од нашиот годишен план за асфалтирање.

Комплетно е реконструирана главната улица во село Злести, на потегот од сретселото до крстосницата за Белчишта и Лешани.

Со оваа инвестиција значително ја подобруваме патната инфраструктура, придонесувајќи за поголема безбедност во сообраќајот и полесно секојдневие на мештаните.

Продолжуваме посветено да работиме на терен и да ги исполнуваме барањата на граѓаните.

Чекор по чекор, заедно градиме поубава и модерна Дебрца!

Дебрца се гради, зборот се исполнува: Нов асфалт до манастирот „Си Свети“ во с. Лешани!

Jun 3, 2026

Дебрца се гради, зборот се исполнува: Нов асфалт до манастирот „Си Свети“ во с. Лешани!

Секое враќање во моето родно Лешани буди посебни емоции, но денеска сум особено горд. Мојот пат започна токму од тука, а денешниот ден е доказ дека дадениот збор пред вас не е празна флоскула, туку моја најголема човечка и градоначалничка обврска.

На само неколку дена пред 7 јуни и големата слава на манастирот „Сите Свети“, започнавме со асфалтирање на патот кој води до ова наше духовно светилиште. Оваа градежна офанзива опфаќа нова асфалтна траса во должина од 350 метри, која ја реализираме преку изведувачот АД „Илинден“ – Струга, а за која одвоивме 2.400.000 денари од годишниот општински план за асфалтирање.

Целта ни беше јасна – градежните работи да бидат во полн ек токму сега, во пресрет на празникот, за да обезбедиме модерен и достоинствен пристап за сите верници кои ќе го посетат манастирот.

Ова е само еден патоказ за тоа како работиме. Она што го ветувам и го реализирам денес во Лешани, е моја обврска за сите села во нашата општина. Токму затоа, сакам да истакнам дека во годишниот план имаме опфатено уште 5 пристапни патишта до верски објекти низ Дебрца кои целосно ќе се реализираат оваа година. Ќе се гради насекаде, ќе се работи во секое населено место и сето она што ви го ветив, секојдневно ќе станува реалност.

Патот кон поубава Дебрца го градиме секој ден.

Oбјавен повикот од Министерството за транспорт и врски за асфалтирање на локалниот пат од село Издеглавје до црква „Св. Димитрија“, во должина од 1 километар

May 19, 2026

Она што со децении го слушавте само како најава пред избори од многумина пред нас, конечно излегува од фиоките и станува реалност!

Официјално е објавен повикот од Министерството за транспорт и врски за асфалтирање на локалниот пат од село Издеглавје до црква „Св. Димитрија“, во должина од 1 километар.

Ние како Општина изработивме комплетна проектна документација и успешно аплициравме за овој значаен проект.

Сакам да упатам огромна благодарност Министерство за транспорт и врски и министерот Александар Николоски, кој покажа разбирање за нашите приоритети.

Многу министри и градоначалници пред нас ветуваа – ние го градиме, нашиот збор има тежина.

Вака се почитува сопствениот народ и вака вистински се сака Дебрца – не со празни зборови, туку со оставање трајни дела кои ќе ги паметат генерациите!

Продолжуваме неуморно, чекор по чекор, за секое наше село!

Известување за затворен патен правец с.Мешеишта-с.Волино

Apr 23, 2026

Се известуваат граѓаните  дека патниот правец на релација с.Мешеишта – с.Волино и обратно, привремено ќе биде затворен за сообраќај поради поставување на електричен  кабел и изведување на градежни работи.

Затворањето ќе важи во периодот од  24.04.2026 година во деновите кои следат се до завршување на работите, во временски интервал од 8:00 часот до 17:00 часот

Се замолуваат сите учесници во сообраќајот да ги користат алтернативните патни правци и да ја почитуваат поставената сообраќајна сигнализација.

Ви благодариме за Разбирањето

Општина Дебрца

Извршено уредување на неколку патишта во општина Дебрца

Apr 11, 2026

Со ангажман на механизација и екипите на терен, се интервенираше на делови каде беше потребно подобрување на проодноста и пристапот.

Посебно внимание беше посветено на дворните места околу верските објекти, со цел тие да бидат уредени и пристапни за сите граѓани.

Целта на овие активности е да се овозможи побезбедно движење и полесен пристап во деновите на празнување.

Како локална самоуправа, продолжуваме со посветена работа на подобрување на условите во секое населено место.

Велигден е празник на мирот, надежта и заедништвото, и токму во тој дух ги реализираме овие активности.

На сите граѓани на општина Дебрца им посакуваме среќен и благословен Велигден, во здравје, мир и радост.